Umunyamakuru Phocas Ndayizera ngo bazamucira urwa pilato mugikari

Uyu munsi Urukiko rw’ibanze rwa Nyarugenge rwaburanishije ifungwa n’ifungurwa ry’agateganyo ku munyamakuru Phocas Ndayizera. Mu rukiko yari kumwe n’itsinda ry’abantu barenga 12 bareganwa nawe ibyaha by’iterabwoba. Urubanza rwabo rwahise rusubikwa ariko ngo nirusubukurwa ruzabera mu muhezo.

Phocas Ndayizera umuryango we wari wabanje kumubura kuva kuwa gatatu tariki 21 Ugushyingo kugera tariki 28 Ugushyingo 2018 ubwo yerekanwaga n’Urwego rw’Ubugenzacyaha ruvuga ko yafatanywe n’abandi bantu i Nyamirambo yagiye gufata ibintu biturika.

Uyu munsi mu rukiko Phocas Ndayizera yari kumwe n’itsinda ry’abantu 12 bareganwa nawe.

Mu rukiko harimo abantu benshi bo mu muryango wa Ndayizera n’abo mu muryango w’umugore we.

Umugore we na we yari ahari n’uruhinja rwabo rw’amezi macye.

Urubanza rutangiye bamwe mu baregwa bavuze ko batazi ibyo baregwa, abandi bagavuga ko batunganiwe, abunganiwe nabo abunganizi babo bavuga ko batabonye umwanya wo kuganira n’abakiriya babo ngo bababwire ibyo baregwa.

Phocas Ndayizera afite umwunganiye mu mategeko.

Urukiko rwemeye ubusabe bw’Ubushinjacyaha rutangaza ko uru rubanza ruzasubukurwa kuwa mbere tariki 17 Ukuboza, rukabera mu muhezo.

Phocas Ndayizera ni umunyamakuru wigenga ukorera inkuru ze BBC ishami ry’ikinyarwanda.

Jean Paul NKUNDINEZA
UMUSEKE.RW