Umuyobozi wa Radio “Ubuntu butangaje “yaburiwe irengero

Ejo Kuwa mbere  tariki ya 7 Mata 2014 nibwo Umuyobozi wa Radio ya Gikirisitu” ubuntu butangaje” benshi bita “Amazing Grace” Ntamuhanga Cassien  w’imyaka 35 yaburiwe irengero. Kuri uyu wa kabiri Polisi yadutangarije  ko yamenye iyi nkuru ndetse ikaba yatangiye iperereza.

Ufitinema, murumuna we avuga ku ibura ry’umuvandimwe we

Umuvandimwe wa Ntamuhanga , Ufitinema Straton  babana ndetse banakorana  yavuze ko mukuru we yavuye murugo ku gicamunsi  nka Saa munani z’amanywa kuwa 7 Mata 2014,  gusa  ngo ahagana saa moya  yavuganye n’umwana wo mu rugo wari wagiye mu ijoro ryo kwibuka ryaberaga kuri Stade Amahoro amubwira ko bari butahane..

Nyuma yaho nibwo Cassien yahamagaye uwo mwana amubwira ko  ngo yatashye ageze ku Gishushu maze uwo mwana atega izindi modoka zisanzwe arataha .Uwo mwana  yaratashye ageze mu rugo afatanya n’abandi kumutegereza.

Ufitinema yagize ati”Twamutegereje nka Saa tanu kugeza mu gitondo,maze mu gitondo tubaza uwitwa Kalinijabo Jean De Dieu  bakorana atubwira ko imodoka ye yazanywe n’umuntu atazi ahita yurira moto yari imutegereje”

Ufitinema yahamagaye Telefoni igendanwa ya Cassien Saa yine ntiyamufata ndetse amwoherereza ubutumwa ntiyasubizwa.Ubu imodoka iparitse imbere yo Kwa Ndamage hafi ya T2000 imbere y’aho Radio Ubuntu butangaje ikorera mu mujyi wa Kigali.

Ahagana Saa cyenda Kuri uyu wa  kabiri bari bagitegereje aribwo uwitwa Jean Paul yabimenyesheje Abashinzwe umutekano.

Umuvugizi  wa Polisi y’Igihugu mu mujyi wa Kigali Umuvugizi wa Polisi y’ igihugu mu mujyi wa Kigali S.Supt. Mwiseneza Urbain yadutangarije ko mu bugenzacyaha aya makuru yabagezeho ndetse bakaba batangiye iperereza.

Ntamuhanga Cassien akaba yaratangiye kuyobora  Radio Ubuntu butangaje igishingwa  kuva yatangira.

Imodoka ye yari amaranye amezi abiri ndetse yari ataramara kwishyura nk’uko tubikesha abayimugurishije. Niyo yabashije kuzanwa n’abantu batazwi bayigeza ku kazi ke.

Umuryango we ukaba ubu uri mu gihirahiro cyo kutamenya aho umuntu wabo ari, niba se agihumeka.

Cassien iyo yajyaga ahatari ku kazi ari butindeyo umuvandimwe we avuga ko yabibamenyeshaga..

Ubusanzwe Cassien Ntamuhanga abana n’abavandimwe bagera ku munani akaba ariwe unabafasha mu mibereho.

Ntacyo bacyeka nk’ikibazo gikomeye yaba yari afitanye n’uwariwe wese cyatuma ashimutwa cyangwa yicwa.

Imodoka ye yazanywe ku kazi ke n’abantu batamenye

Ikirenga.com

UMUSEKE.RW