Perezida Kagame yavuze ko umutekano w’abantu bigeze guhigwa ngo bicwe udashobora kureberwa mu bintu bifatika gusa kandi ko isi itazigera itekana mu gihe cyose ingengabitekerezo zumvikanisha kwica nk’igikorwa cyo gukunda igihugu zitaratsindwa burundu.

Ibi Umukuru w’Igihugu yabigarutseho ubwo yagezaga ijambo ku nama ya AIPAC ihuza Amerika na Israel ndetse n’abafatanyabikorwa yatangiye kuri iki Cyumweru i Washington DC ikazasozwa kuwa 28 Werurwe 2017.

Iyi nama yitabiriwe n’abantu bagera ku bihumbi 19 ndetse byitezwe ko abayobozi bakomeye barimo Minisitiri w’Intebe wa Israel, Benjamin Netanyahu (uzatanga ikiganiro akoresheje Satellites) na Visi Perezida wa Amerika, Mike Pence bazageza ijambo ku bitabiriye.
Ni mu gihe ku munsi ufungura, Perezida Kagame n’Uwahoze ari Minisitiri w’Ububanyi n’Amahanga w’u Bwongereza, Tony Blair, aribo babimburiye abandi.

Perezida Kagame yavuze ko bikwiye ko hashyirwa imbaraga hamwe mu kurwanya abantu bose bapfobya Jenoside n’abatesha agaciro abayiguyemo.

Ati “ Umutekano w’abantu bigeze guhigwa kugirango barimburwe ntabwo ushobora kureberwa mu bigaragara gusa. Kugeza igihe ingenganitekerezo zumvikanisha kwica nk’igikorwa cyo gukunda igihugu zitaratsindwa burundu, Isi yacu izaba itaragira ituze, yaba kuri twe yaba no ku wundi wese.”

Yakomeje avuga ibihugu bikwiye gushyira hamwe mu kurwanya abapfobya Jenoside. Ati “Hamwe n’inshuti nka Leta Zunze Ubumwe za Amerika , tugomba gukomeza gusaba isi ubufatanye mu kurwanya abapfobya Jenoside bakanatesha agaciro abayiguyemo.”

Muri 2014 u Rwanda rwabaye igihugu cya mbere muri Afurika cyasinyanye amasezerano y’umubano na Israel. Aya masezerano y’ubufatanye yashyizweho umukono hagati y’ibihugu byombi n’abaminisitiri b’Ububanyi n’Amahanga, agamije imikoranire n’imibanire mu bya politiki n’ubukungu.

Tariki ya 11 Kamena 2014, mu kiganiro n’abanyamakuru ubwo yari amaze kubonana na Perezida wa Repubulika Paul Kagame muri Village Urugwiro, Minisitiri w’Ububanyi n’Amahanga wa Israel, Avigdor Liberman, yatangaje ko kuba u Rwanda na Israel ari ibihugu bibiri bisangiye amateka mabi, ari n’amahirwe y’uko byanoza imikoranire mu iterambere.

U Rwanda rusanzwe rufatanya na Israel mu bijyanye n’ubuhinzi, ndetse hari n’abanyeshuri bajya kwihugura muri Israel mu bijyanye n’iyi ngeri.

Perezida Kagame yavuze ko yishimiye kuba Israel iri gukorana na Afurika ndetse uyu mugabane ukabyakira neza; yatanze urugero ku nama abakuru b’ibihugu batandatu bo mu karere ka Afurika y’Iburasirazuba bagiranye na Netanyahu ubwo aheruka kugenderera aka gace bakigira hamwe uko barandura ibikorwa by’iterabwoba.

Iyi nama yabaye mbere gato y’uko kuwa 6 Nyakanga Netanyahu yagiriye uruzinduko rw’umunsi umwe mu Rwanda aho yasuye urwibutso rwa Jenoside yakorewe Abatutsi ku Gisozo.

Ibi bihugu byombi kandi bifite amateka ajya gusa kuko usibye Jenoside yakorewe Abatutsi igahitana abasaga gato miliyoni; Abayahudi bagera muri miliyoni esheshatu bishwe urubozo mu ntambara ya kabiri y’Isi mu bihugu by’i Burayi mu bwicanyi bwari buyobowe n’ uwari umutegetsi w’ u Budage, Adolph Hitler bazira ubwoko bwabo ndetse n’ imyemerere.

Perezida Kagame ahabwa ikaze na Lilian Pinkus, Perezida wa AIPAC

Perezida Kagame asuhuzanya na Frank Sesno wahoze ari Umunyamakuru kuri CNN ubu akaba ari umwanditsi

Uwahoze ari Perezida wa AIPAC, David Victor, ubwo yavugaga ibigwi bya Perezida Kagame mbere yo kumuha umwanya ngo ageze ijambo ku bitabiriye iyi nama

Perezida Kagame ubwo yahabwaga ikaze ngo ageze ijambo ku bitabiriye inama ya AIPAC

Perezida Kagame ubwo yagezaga ijambo ku bitabiriye inama ya AIPAC

Niwe Mukuru w’Igihugu wo muri Afurika wa mbere ukoze amateka yo kugeza ijambo ku bitabiriye inama ya AIPAC

Umukuru w’Igihugu yashimangiye ko Israel ari inshuti ikomeye y’u Rwanda kuko ari ibihugu bisangiye amateka

AIPAC iri mu mpamvu ziza ku isonga zituma benshi bavuga ko Abayahudi ari bo bayobora Isi bitewe n’uko byinshi mu byo abagize uyu muryango baba bifuza bahanira ko bishyirwa mu bikorwa n’abategetsi bo hejuru muri Amerika kandi bikarangira bikozwe

Chemi Peres, Umuhungu wa Perezida Shimon Peres ari kumwe n’umwana wo muri Palestine wavuriwe umutima mu kigo Peres Center for Peace cyashinzwe na Shimon

Abantu bakomeye mu ngeri zose bitabiriye iyi nama yerekaniwe ikoranabuhanga Israel imaze kugeraho mu ngeri