Kizito na bagenzi be bakatiwe gufungwa iminsi 30 ngo batabangamira iperereza

Inkuru dukesha igihe gikorera m’urwanda

Kuri uyu wa Mbere tariki 28 Mata, umuhanzi Kizito Mihigo n’abo baregwa hamwe bakatiwe n’Urukiko rw’Ibanze rwa Kacyiru kuba bafunzwe iminsi 30 y’agateganyo mbere y’uko urubanza baregwamo n’ubushinjacyaha ibyaha bine birimo no gushaka kwica Perezida Paul Kagame rutangira mu mizi.

Umucamanza yavuze ko Kizito Mihigo, Ntamuhanga Cassien, Niyibizi Agnes na Dukuzumuremyi Jean Paulibyaha bakurikiranweho bikomeye cyane ku buryo baramutse barekuwe bashobora kubangamira iperereza, bagatoroka cyangwa se bagasibanganya ibimenyetso abandi bavugwa kugira uruhare muri iki gikorwa bakaba bacika ubutabera.

Kizito na bagenzi bateze be amatwi imyanzuro y’urubanza

Kuwa Kane w’icyumweru twashoje ubwo abaregwa bitabaga urukiko rw’ibanze rwa Kacyiru, umushinjacyaha Budengeri Boniface yari yabasabiye kuba bafunze iminsi 30, kuko ibyaha baregwa bikomeye cyane, kandi ibihano bashinjwa bikaba bihanishwa igihano kirenze imyaka ibiri n’igice y’igifungo ndetse ngo bakaba bashobora no gucika ubutabera.

Umucamanza ahereye ku byo abaregwa bose uko ari bane biyemereye yafashe icyemezo cy’uko abaregwa bagomba gufungwa iminsi 30 agendete ku ngingo ya 89 agace kabiri yerekeye imiburanishirize y’imanza nshinjabyaha ivuga ko umuntu ashobora gufungwa by’agateganyo iminsi 30 igihe umucamanza abonye ko uregwa akurikiranweho ibyaha bikomeye.

Umucamanza yavuze ko hari impungenge ko aba bantu bashobora gutoroka ubutabera kubera ibyaha bakurikiranweho, kuba bashobora gusibanganya ibimenyetso n’abandi bafatanije bakaba bacika ubutabera ibi ngo ni bimwe bigendeweho kugira ngo Kizito Mihigo nabo baregwa hamwe babe bafunze iminsi 30.

Icyifuzo cyari cyatanzwe na Me Bigaraba Rwaka John wunganira Kizito Mihigo cy’uko yafungurwa kubera ko ibyo yakoze nta gikorwa gifatika byagezeho bityo hakaba hari kugaragazwa ingaruka byateye umucamanza yavuze ko nta shingiro bifite uko ikosa ritagaragazwa gusa n’ingaruka kiba cyateye.

Kizito na bagenzi be bakurikiranweho nu gushaka kugirira nabi ubutegetsi buriho, ubugambanyi no gushaka kugirira nabi Perezida, ubufatanyacyaha, ndetse no gucura umugambi w’icyaha cy’ubwicanyi.

Guhera kuri uyu wa 28 Mata 2014 umuhanzi Kizito Mihigo n’abo baregwa hamwe barinjizwa muri gereza ndetse banambikwe n’umwambaro usanzwe w’imfungwa n’abagororwa.