Burundi: Umwe mu bayobozi bakuru b’igisirikare yiciwe ku biro
Hashize amasaha make hamenyekanye inkuru y’uko Lt Col Ikurakure Darius, yishwe n’abantu bataramenyekana ubwo yari ku biro bikuru bya gisirikare mu masaha y’akaruhuko ko ku gicamunsi cyo kuri uyu wa Kabiri tariki 22 Werurwe 2016.
- Lt Col Ikurakure Darius umaze amasaha atagera kuri 3 yishwe
Lt Col Ikurakure, yari umuyobozi w’inkambi ya Genie de combat, ndetyse akaba ari we wari umuyobozi ushinzwe umutekano mu karere ko majyaruguru y’umurwa mukuru Bujumbura, ahari uduce twa Mutakura, Cibitoke na Ngagara, haherutse gufatirwa abarwanyi bitwaje ibirwanisho benshi mu minsi ishize.
Uyu musirikare yavuzwe cyane mu bikorwa byo guhagarika abantu bigaragambyaga muri ako karere ko mu majyaruguru ya Bujumbura, hakunze kubamo ibikorwa by’imyigaragambyo byinshi yo kwamagana manda ya gatatu ya Nkurunziza.
Kuri ubu abashinzwe umutekano bazengurutse ahari ibiro bikuru bya gisirikare, nta muntu uri kunyura mu mihanda ihegereye.
Kugeza ubu nta muntu uramenyekana ko yaba ari we wihishe inyuma y’ubwo bwicanyi, ndetse n’igisirikare nta cyo kirabivugaho.
