Rusizi : Abagizi ba nabi bitwaje imbunda bishe babiri bahungira i Burundi

Mu gicuku cyo kuri iki cyumweru tariki ya 12 Werurwe 2017, Abagizi ba nabi bitwaje imbunda, bateye mu Karere ka Rusizi , mu Murenge wa Bugarama, Akagali ka Ryankana mu Mudugudu wa Kabuga, bica abantu babiri banakomeretsa bikomeye undi.

Aba bagizi ba nabi bataramenyekana, ngo bahise bahungira mu Gihugu cy’uburundi nk’uko byasohotse mu itangazo ryashyizwe hanze na Minisiteri y’Ingabo mu gitondo cyo kuri iki cyumweru.

Harerima Frederic Uyobora Akarere ka Rusizi yasabye abaturage gukaza amarondo mu Rwego rwo gukumira abagizi ba nabi

Iri tangazo ryashyizweho umukono n’Umuvugizi w’igisirikare cy’u Rwanda RDF, Lt Col Rene Ngendahimana, ryatangaje ko abishwe n’aba bagizi ba nabi ari Manirafasha Benjamin na Ntabanganyimana Jerome, uwakomerekejwe n’iki gitero akaba ari Ndikuryayo Said.

Abaturage bo muri aka gace baganira na Kigalitoday, batangaje ko aba bagizi ba nabi ngo bahuye n’abanyerondo bakabasaba ibyangombwa, aho kubibaha bagatangira kubarasa, nyuma bagahita bahungira i Burundi.

Aba baturage kandi batangaje ko aba bagizi ba nabi basize bimwe mu bimenyetso n’ibirango by’Ishyaka CNDD-FDD riri ku butegetsi mu gihugu cy’Uburundi.

Lt Col Ngendahimana muri iri tangazo, yatangaje ko iperereza ryatangiye kugirango, aba bagizi ba nabi bamenyekane bazaryozwe ubu bwicanyi.

Lt Col Rene Ngendahimana uvugira RDF yatangaje ko iperereza ryatangiye kugira ngo aba bagizi ba nabi bavumburwe

Umuyobozi w’Akarere ka Rusizi Harerimana Frederic yihanganishije abaturage baburiye ababo muri iki gitero , abasaba kurushaho kuba maso no gukaza amarondo, kugira ngo babashe guhashya aba bagizi ba nabi.

Si ubwa mbere abagizi ba nabi bitwaje imbunda baturutse mu Burundi bagatera abanyarwanda baturiye umupaka uhana imbibi n’iki gihugu.Akenshi ngo babaga baje kwiba imyaka n’amatungo, rimwe na rimwe bagasiga bakomerekeje abo baje kwiba.