Mbarushimana Yasabwe kwisenyera ibikorwa afitiye ibyangombwa(Yahinduwe)

Umugabo witwa Mbarushimana Ibrahim ufite ibikorwa byo gutwara abantu mu bwato mu ikompanyi yitwa “Banguka LTD” mu gishanga cya Nyabugogo, giherereye mu karere ka Nyarugenge, yasabwe n’ubuyobozi bw’Umujyi wa Kigali guhagarika ibikorwa bye byo gutwara abantu, mu gihe REMA, RDB na RURA byo bimwemerera gukora akazi ke nta nkomyi.

Ubwato bwambukirizwamo abagenzi mu gishanga cya Nyabugogo bukavugwaho ko bwagabanyije urugendo no kuzenguruka kw’abava cyangwa bajya Gisozi (muri Gasabo) na Nyabugogo muri Nyarugenge)

Ubusanzwe Mbarushimana yambutsa abantu baba bashaka kuva ku Gisozi berekeza mu Gatsata na Nyabugogo, ndetse n’abajya ku Gisozi baturuka i Nyabugogo no mu Gatsata, aho kwambuka ari amafaranga 150 y’u Rwanda, ndetse by’akarusho abanyeshuri bo bambukirizwa ubuntu mu bwato bwa Mbarushimana.

Mbarushimana Ibrahim wihangiye umushinga wo kwambutsa abantu mu bwato mu mujyi wa Kigali

Mu ibaruwa Mbarushimana yandikiwe n’Umujyi wa Kigali, Akarere ka Nyarugenge, kuwa 10 Nyakanga 2013, igira iti “Bwana Mbarushimana Ibrahim, nkwandikiye ngusaba guhita uhagarika ibikorwa byo gutwara abantu mu bwato mu gishanga cya Nyabugogo kuko mutabifitiye uburenganzira kandi bikaba binyuranyije n’itegeko ngenga nimero : 04/2005 ryo kuwa 08/04/2005 rigenga uburyo bwo kurengera, kubungabunga no guteza imbere ibidukikije mu Rwanda.”

Ibi binyuranije n’ibaruwa yandikiwe na REMA kuya 6 Kanama 2013 imusaba guhagarika inyubako, imbuga n’inzira ndetse n’ubusitani mu nkengero z’icyo gishanga.

Mu gika cya gatatu cy’iyo barwa yanditswe na REMA, ho hagiraga hati : “Ndabamenyesha ko igihe ntarengwa muhawe cyo kuba mwavanyeho ibikorwa mwakoreye muri kiriya gishanga kingana n’ukwezi kumwe, naho igikorwa cyo gutwara abantu mu bwato cyo cyagumaho.”

Inyubako Mbarushimana asabwa gusenya we ntiyumva impamvu asabwa kuyisenya kuko atari inzu isanzwe igenewe ibindi bikorwa, uretse kuba iyo gutegererezamo

Icyo Mbarushimana abivugaho

Mu kiganiro kirekire yagiranye na IGIHE, Mbarushimana avuga ko we atumva neza impamvu ahagarikirwa ibikorwa byo gutwara abantu mu bwato kandi yarabiherewe uburenganzira n’ibyangombwa bimwerera gukora.

Ati “Ntabwo numva impanvu mpagarikwa n’ubuyobozi bw’umujyi wa Kigali gukora kandi mbifitiye uburenganzira nahawe na REMA, RURA ndetse n’icyemezo cy’iyandikwa ry’umushinga nahawe na RDB.”

Mbarushimana avuga ko aha hantu hatunganyijwe gutya hagenewe gusa kwicarwa n’abagenzi bategereje kwambutswa mu bwato hagati ya Nyabugogo na Gisozi

Abajijwe n’umunyamakuru impamvu yubatse inzu mu nkengero z’igishanga, arinabyo bimutera gusabwa n’umujyi wa Kigali ndetse na REMA, kureka bimwe mu bikorwa bye, yasubije ko iriya Atari inzu mu buryo bashaka kubifatamo.

Ati “Ntabwo nubatse inzu. Aha ni aho abagenzi bugama izuba n’imvura. Ikindi iyo uhawe uburenganzira bwo gutwara abantu n’ibintu mu mazi, ugenerwa n’aho babasha kwikinga izuba.”

Abajijwe ikibazo kijyanye no kuba asabwa gukuraho ubusitani yateye ndetse n’imbuga zubatswe zishashemo amatafari (Pavées), yasubije agira ati “Nubaka aha hantu nagendeye ku gishushanyo mbonera cy’umujyi wa Kigali. Muri icyo gishushanyo herekana ko iki gishanga kizaba kigizwe n’ikiyaga kizahashyirwa, ubusitani mu nkengero zaho ndetse n’utuyira tw’abanyamaguru twubakishijwe(Pavé) nta kosa narimwe nakoze.”

Mbarushimana afite ibikoresho byose bya ngombwa mu kwambutsa abantu mu bwato birimo n’amakoti yabugenewe yambarwa n’abari mu mazi

N’iki cyaba cyihishe inyuma y’ibi byose ?

Mbarushimana Ibrahim, wihangiye umushinga wo kwambutsa abantu mu gishanga cya Nyabugogo, avuga ko amaze kubona amabaruwa amusaba guhagarika ibikorwa bye, yandikiye Minisiteri y’umutungo kamere ayisaba kumurenganura, ariko ngo kugeza ubu ntagisubizo arahabwa nyuma y’amezi agera kuri abiri yanditse iyo barwa.

Mbarushimana avuga ko mu makuru agenda yumva hirya no hino, ngo yumva ko umushinga we waba warifujwe n’undi muntu w’umuherwe, yagera muri RDB ashaka kuwandikisha bakamutera utwatsi ko uwo mushinga ufite nyira wo kandi watangiye no gukora.

Amazina y’uwo muntu uri kumugendaho ashaka kwegukana umushinga we, Mbarushimana avuga ko yabashije kuyamenya, ariko akaba atayatangariza itangazamakuru.

Avuga ko, uyu mukeba we amaze kubona ibyo byose byanze, ngo yatangiye kwegera umujyi wa Kigali n’akarere ka Nyarugenge, kugira ngo Mbarushimana asenye ibikorwa bye byose ndetse anashyirwaho amananiza yo gukora.

Uburyo Mbarushimana yari yaratunganyijemo ubusitani bwo ku nkengero z’icyo gishanga

Kugeza ubu Mbarushimana ufite kompanyi itwara abantu mu bwato mu mujyi wa Kigali yitwa “Banguka LTD” yahagaritse imirimo ye nyuma yo kwandikirwa ayo mabaruwa yose.

N’akababaro kenshi, Mbarushimana agira ati “Bansabye kwisenyera, bazaze babisenye kuko byantwaye amafaranga menshi mbishyiraho. Kuki batambujije mbere hose ntangira umushinga wajye ?”

Icyo ubuyobozi bw’Umujyi wa Kigali buvuga

Nyuma y’uko mbere Ushinzwe itangazamakuru mu Mujyi wa Kigali, Rangira Bruno, atari yabashije kugira icyo avuga mu gihe cy’isaha yari yahaye abanyamakuru, ku mugoroba wo kuri uyu wa Mbere yagaragaje ko icyemezo cyo guhagarika Mbarushimana cyaturutse ku kuba ibikorwa bye akora bitari mu mazi y’ikiyaga nyirizina ahubwo biri mu gishanga, ku buryo ngo kuba abikorera mu gishanga binyuranyije n’itegeko rirengera ibidukikije.

Ikindi kandi Umujyi wa Kigali ugaragaza ko hari n’impungenge ko kwambutsa abantu bishobora guteza impanuka.

Abajijwe impamvu ubuyobozi bw’Umujyi butamuhagaritse mbere y’igihe kandi hakaba nta n’impanuka izwi ubwato bwari bwateza kandi anafite ibikoresho byo kwirinda impanuka(amajile), Rangira yagize ati “Ntabwo twategereza ko habaho impanuka kugira ngo tumuhagarike. Ikindi kuba REMA na RURA bimwemerera gukora ntabwo bivuze ko Umujyi wa Kigali uramutse ubonye hari imbogamizi byatuma adashobora guhagarikwa.”

Rangira akomeza avuga ko Ubuyobozi w’Umujyi bwasezeranyije uyu musaza ko hagiye gushakwa umuti urambye, hakaganirwa n’inzego zose bireba, yaramuka akomeje gukora agakora nta mpungenge na mba ziriho.