esther murebwayirebible_read_meKigali Nyakubahwa, Hashize imyaka icumi irenga ubwo nabandikiraga, hari ku italiki ya 09-02-2003. Ubwo butumwa bwari bufite impamvu yavugaga ngo: «Gutanga umuti wo gukiza uRwanda». Nyuma y’ iminsi itatu nibwo nahamagazwaga kuri polisi gutanga ibisobanuro birambuye by’ ubwo butumwa. Nasubije ibibazo byose polisi yambajije, banyizeza ko bazabibagezaho. Ibyo Imana yabasabaga Nyakubahwa, byari bikubiye muri aya magambo: Kwakira Agakiza, guha Yesu Kristo igihugu, gutegeka iminsi itatu y’ amasengesho nka ya yindi yakozwe mu gihugu cy’ i NINIVE, (Yona 3), abakozi b’ Imana kuva mu bidatunganye byo kwivanga, n’ ibindi. Nyakubahwa, mu byo Imana yabasabaga gukora nta na kimwe mwakoze, ahubwo mwarushijeho gukora ibyangwa n’ Uwiteka bikaba byarakomeje gukongeza umujinya we kugeza ubu, kuko ibibi byagiye bisimburwa n’ ibindi bibi. Impamvu nongeye kubandikira bwa kabiri akaba ari nabwo bwa nyuma, n’ uko ntacyo mwigeze mukora gitunganye imbere y’ Imana yanjye, mukaba mugaragara nabi birenze iby’ abababanjirije bose, kandi Uwiteka akaba ababwira ngo: «NAKUVANYE MU BUSA NGUHINDURA UKOMEYE, ARIKO NTIWIGEZE UNSHIMIRA, NTIWIGEZE UMPESHA ICYUBAHIRO NA RIMWE, NIYO MPAMVU NAGUCIYE KU NGOMA NKABA NARAYIGABIYE UNDI UZANYUBAHA AKANYUBAHISHA. NGIYE KWISUBIZA ICYUBAHIRO WANYATSE, KANDI NSUBIRANE AMASHIMWE YANJYE WANYIMYE IMBERE Y’ ABENEGIHUGU N’ AMAHANGA YOSE. NAGUSHYIZE IMBERE IBIBAHO BYOSE BYARI KUGUTERA GUKORA NEZA ARIKO WARIHIMBAJE, ICYUBAHIRO CYANJYE SINZAGIHA UNDI» : Niko Uwiteka avuze. Uwiteka arongeye arantumye kuko ndi intumwa ye nkaba n’ umuhanuzikazi uhanurira amahanga, cyane cyane uRwanda n’ Ibiyaga Bigali. Ngo nimbabwire ngo: 1.IBIBI, IBIBI, IBIBI BIKABIJE, UBUGOME BW’ INDENGAKAMERE MWABIHINDUYE UMWUGA WA BURI MUNSI, BURI SAHA NA BURI MUNOTA. 2.UBWICANYI BWABAYE AKAMENYERO, AMARASO Y’ ABANTU NAREMYE MU ISHUSHO YANJYE MWAYAHINDUYE NK’ AMAZI, MURAYASESA KU BUTAKA BWANYU NO KU BW’ ABANDI, MUTAZI KO AZABASAMA. 3.MURICA MUKICA URUBOZO, INZIRAKARENGANE ZIRANTAKIRA AMANYWA N’ IJORO 4.MURATOTEZA ABO ARIBO BOSE BATEMERA IBYO MUKORA, KANDI NABO BAFITE UBURENGANZIRA 5.MURICISHA INZARA KU BUSHAKE ABENE GIHUGU MUBESHYA KO MUBARENGERA 6.MWABAYE BABI MURUSHA ABABABANJIRIJE BOSE 7.MWATEJE UBWOBA ABENEGIHUGU N‘ ABATURARWANDA, BAHINDUTSE IBISHUSHUNGWE, N‘ IBIKANGE. Niko Uwiteka avuze. Byose biraterwa no kwinangira imitima kwanyu mwebwe n‘abo mutegekana, mwahaye intebe Satani, mumuha igihugu nabahaye, mumwicaza ku ntebe y‘ Umwami w‘ abami Yesu Kristo, muyima Yesu Umwami w‘ amahoro, akaba ari nayo mpamvu igihe cyose mugitegeka nta mahoro ashobora kuba mu Rwanda. Ibyo ni byo bigiye kubakoraho vuba na bwangu, aho isi yose igiye kureba ibihembo by‘ abagome n‘ abatumvira Imana, kuko nta mahoro y‘ abanyabyaha, kandi ibihembo byabo ni urupfu rw‘ iteka. Nasobanuye kenshi mbwirijwe n‘ Umwuka w‘ Imana, ko kubera umuhamagaro uri ku banyarwanda, niyo mpamvu ari Imana, ari na satani baduhozaho amaso, ariko ntabwo byigeze bifatwa nk‘ ukuri. Mboneyeho akanya ko kubibutsa ko abakozi b‘ Imana mukurikira nk‘uko nari nabibukije mu butumwa bwa mbere ko bataye inshingano, ndetse barasayishije cyane, bataye igihugu bajya kwivanga n‘ abanyepolitiki mbi, bagafatanya namwe kwica, kurenganya, kwiba, n‘ urugomo. Babaye abafatanya-byaha gutyo, bishimira kubabwira ibyo mushaka kumva bakirengagiza ukuri kandi bakuzi, aba na bo ibihano byabo bikaba byegereje. Nyakubahwa, ubu butumwa nibwo bwa nyuma bunturutseho mu nyandiko, kandi nta n‘ ubwo ari ukugirango muhinduke cyangwa muhindure imikorere, cyangwa mube umuntu Uwiteka yishimira, cyangwa mukizwe. Oya! ahubwo igitumye Imana intuma ni ikindi kidafite aho gihuriye n‘ ubuzima n‘ ubugingo byanyu, ahubwo ubu butumwa burarebana n‘ urubyaro rwanyu n‘ abazabakomokaho: abana, abuzukuru, abuzukuruza, ubuvivi n‘ abandi, kandi buranareba n‘abo mukorana iminsi yose. Kuko iyo Farawo aza kumenya ko azapfusha umwana we w‘ imfura, ahari aba yarumviye Uwiteka ku cyago cya mbere. Ariko yarindiye icyago cya 10 kuko aricyo umwana we yaguyemo! Niba mwumva mwakwifuza ko nyuma yanyu hari icyazasigara mu muryango wanyu, hakazagira nibura umwana umwe witirirwa ko yazaba akomoka kuri Paul Kagame, n‘ubwo bitazamworohera kubana n‘ abandi benshi mu isi, ariko nibura akazasigara kuko nta wamenya, aharaho yazaba ubuhamya bwazakiza abandi. Niba mwumva mwatekereza inyuma yanyu; niba muteganiriza abana banyu ibyiza; niba mukora ngo aribo mukorera; niba hari igihe mujya mubyibazaho ko n‘iyo mwavaho, mukanapfa, hagira umwana wanyu usigara, murakora vuba ibi bikurikira: 1.Murahagarika kwicira abantu ubusa, mukimara gusoma ubu butumwa 2.Murafungura imfungwa kugirango muteganirize bamwe bo muri mwe umunyururu 3.Murashyingura amagufa yose ari ku gasozi no muri za étagères atarashyinguwe, 4. Muraca iteka musezerere ubugome no kurenganya n‘ inzangano, agahe gato musigaje kuri uwo mwanya. Kuko niba mwarahisemo kwanga Imana mugatanga ubuzima n‘ ubugingo byanyu kwa Satani, hakaba hasigaye ubw‘ abana banyu (niba nabo mutarabatanga), Imana irabasaba gukora ibivuzwe haruguru, kugirango hazagire ubakomokaho uzasigara mu isi. Bitabaye ibyo, n‘ ubwo muzaba mutakiri mu isi y‘ abazima, abazasigara bazatangarira ibizakurikirana umuryango wanyu, kuko uzaba akabarore hose mu isi. Nyakubahwa, ubwo nabonanaga n‘ umufasha wanyu taliki ya 25 Nzeri 2009, ndi kumwe na nyakwigendera ministre Inyumba Aloysia, nababwiye byinshi Imana yashakaga ko byakorwa ngo igabanye ibihano, haboneke agahenge k‘ amahoro Ikoresheje abagore, ariko nta na kimwe cyakozwe, cyane ibyerekeranye n‘ izo ntebe mwicayeho. Kirya gihe iyo bikorwa amahano agiye kugwirira igihugu yari kugabanywaho. Nk‘ umubyeyi wabyaye, byamumarira iki gusigara mu isi ari incike ku bw‘ impamvu zigaragara. Kuko igihe cyose utumviye Imana kandi ifite ibyo igushakaho, ikaba yaranabigusabye, ingaruka ziba mbi cyane.. Niba ari umubyeyi yarabyaye akaba adashobora guhagararira urubyaro ngo arurengere rudashira, kubyara ntacyo byaba byaramumariye. Kuko mutirengagije ibyo mukora ku mugaragaro sibyo mukora mu bwihisho. Mukibagirwa nkana ko Imana yo ibona byose , izi byose ,inashobora byose! Aha humvikane neza ko ibihano bya bamwe bihitana n‘ abandi nkuko byagiye bigenda mu mateka y‘ abanyarwanda, aho bamwe bazira abandi, kuva cyera, aribyo byitwa ibyaha rusange, kubera ko no mu byiza n‘ ababi babibonaho: muzabisobanukirwa. Mwarabwiwe Nyakubahwa, ntabwo ari njye ubatumweho gusa, kandi nshobora kuba atari nanjye wa nyuma ubabwiye, uretse ko binashoboka. Mutegeke abanyamadini bazabasomere kandi babasobanurire amateka y‘ aba bami: 1. Farawo (Kuva ibice 5 kugeza ku bice 12) 2. Sawuli (1 Samweli 15) 3. Ahabu (1 Abami ibice 20 na 21) Musabwe gukora ibyo Imana ibasaba, atari ukubera mwebwe ku giti cyanyu, ahubwo kubera abana banyu n‘ abazabakomokaho (umuryango). Nk‘uko namwe mwavukije abandi bana ababyeyi babo, mukavutsa ababyeyi abana babo, mukavutsa imiryango bene wabo, mugateza agahinda n‘ imiborogo bigeza aho umuntu apfusha ntatake, ntanabone uburenganzira bwo kuririra uwe ngo anamushyingure mu cyubahiro gikwiye uvuye mu isi wese, icyo mwabibye mugomba kugisarura kuko iryo ni ihame, ariko mukoze biriya Imana isaba, byaba igiciro cyo guca bugufi kandi iyo mbuto itarangwa muri mwe, mwaba muteganirije urubyaro rwanyu mu bihe bizaza. Nimukomeza kunangira umutima rero, Imana izasohoza gahunda yayo yabavuzeho. Murasabwa gutekereza cyane, mugapima uburemere bwabyo, kuko Imana izi ko ari IKIGERAGEZO ibahaye muri byinshi yabahaye byose mukaba mwarabitsinzwe. Imana se w‘ Umwami n‘ Umucunguzi wanjye Yesu Kristo, Iraje ice amateka atabera mu Rwanda, kandi byose izabihindura bishya. Ndangiza nagirango mbamenyeshe ko amagambo mwabwiye urubyiruko kuri 30-06-2013, ko ngo abana b‘ abahutu bagombaga kwihana ibyaha bya ba se,n‘ abahutu bakihana ibyaha byakozwe mw‘ izina ry‘ ubwoko bwabo, ntabwo arimwe mwagombaga kubibakangurira cyangwa kubibagiramo inama, nta burenganzira na buke mwari mubifitiye bwaba ubwo mu mubiri cyangwa ubwo mu Mwuka, ntabwo ariko bigenda,siko byagombaga kukorwa rwose,ndetse kubihindura ihame mu gihugu bizangiza byinshi kuruta uko byakiza. Ibintu bigendanye no KWIHANA no KUBABARIRA bikorwa n‘ UMWUKA W‘ IMANA kuko niwe utagira ubugome, amarangamutima, inzika no guhora, byose abikora mu rukundo ruzira uburyarya. Ibisobanuro byabyo nzabiha abanyarwanda mu buryo bwose bw‘ ivugabutumwa, kwigisha n‘ ubuhanuzi mu gihe kiri imbere. Nyakubahwa, ibirebana no kwihana kw‘ abahutu n‘ abatutsi byagombaga gukorwa n‘ ITORERO rya Yesu Kristo, ariko ntabyo bakoze. Aha ndibutsa abayobozi b‘ amadini n‘ aba Leta ko ibihe byose nagiye mbasobanurira ikibazo cy‘ amoko mu Rwanda, benshi bagiye babirwanya kubera ibikomere n‘ ubwoba, abandi bakabikora by‘ umuhango. Niteguye gusobanurira abanyarwanda ibyo Imana yashakaga ko bikorwa byose , kuko ntacyo yabahishe, nkaba narakoze ibyo nari nshoboye. Nubwo ibyo nakoze nabizize,ariko ndashima Imana ko hari abo byabohoye imitima kuko byabaga bivuye ku Mwuka W‘ Imana, kuva muri 1999. None ibyo mwanzizaga kiriya gihe, nibyo murimo gukora ubu, kandi mukabikora mubicuritse, mubivangavanze, mwihesha amahoro mwihimbiye! niko mwagombye kuba, ariko haracyari inzitizi nyinshi zibabuza kuba abanyarwanda, kandi inzira iracyari ndende! Nzasobanurira abanyarwanda ukuntu inzego z‘ amadini n‘ iza Leta bagiye barwanya igikorwa cyo KWIHANA mu gihugu,kugeza kuri 30-06-2013 ubwo mwabafunguriraga iriya nzira yabatinyuye ku mugaragaro, mubemeza neza ko mu Rwanda haba amoko, mukaba mwarivuguruje mutyo nk‘ umukuru w‘ igihugu, kuko ubundi mwashimangiraga ko nta yo abaho, ndetse bamwe bakaba baranabizize. Aha navuga nti:(mwibutse ibitereko mwasheshe). Kuba umunyarwanda birahanirwa kuko byambuwe agaciro n‘ ibikorwa bibi by‘ amoko. Ntabwo mwapfa gusimbuka intera iri hagati y‘ amoko n‘ ubunyarwanda mutabanje gukora ibisabwa… Ndasenga ngo Imana ihindure imitima ya benshi mu banyarwanda yabaye akahebwe, bemere kandi bizere Umwana wayo Yesu Kristo wabapfiriye ku musaraba, kugirango babone ubugingo buhoraho, ababarire ibyaha byabo, maze abakirize n‘ igihugu, maze abahe amahoro arambye. Icyubahiro ni icyayo iteka ryose, mu Izina rya Yesu Kristo w‘ i Nazareti, Amen Murebwayire Marie Esther Prophétesse des Nations

 

Murebwayire Marie EstherProphétesse des Nations esthervision2000@yahoo.com Tel.+31657795127(sms)