Abarimu barasaba Leta ifunguro rya saa sita

Kuri uyu wa kane mu nama nyunguranabitekerezo  yahuje  abafite aho bahurira n’uburezi mu mirenge n’uturere tugize Intara y’Amajyepfo n’iburengerazuba, abayobozi bungirije bashinzwe imibereho myiza y’Abaturage, n’Abayobozi b’ikigo gishinzwe  guteza imbere uburezi muRwanda(REB) abarimu basabye Minisiteri y’uburezi ko yabagenera ifunguro rya saa sita mu rwego rwo kunoza umurimo wabo.

Bamwe mu barimu bitabiriye ibiganiro ku ireme ry’uburezi.

Mu gihe leta yifuza ko ireme ry’’uburezi mu mashuri y’inshuke, abanza ayisumbuye na Kaminuza birushaho kwimakazwa, abarimu bigisha mu mashuli abanza barasaba inzego za leta ko zabagenera ifunguro rya saa sita, kugirango nabo babone uko bita ku masomo baha abanyeshuri.

Aba barimu bavuze ko umushahara bahabwa utabemerera kubona amafaranga batanga mu ngo zabo hanyuma ngo bagire andi basagura yo guhora batega bajya mu ngo zabo gufata ifunguro rya saa sita.

Aba barimu bakomeza bavuga ko iyo bagiye kuruhuka bibasaba kugenda  n’amaguru bityo bakagera ku ishuli batinze ndetse bamwe muri bo bagahitamo kwihamira  ku bigo  kandi bashonje.

Bavuze ko  uyu mutwaro bawukuriweho ibyo basabwa kuzuza babisohoza nta zindi mbogamizi zibayeho.

Tabaro Jean Claude ni umwarimu kuri college de la paix mu karere ka Rutsiro yavuze ko ubushobozi bwa mwarimu butamwemerera kugira ikindi yakora gisaba amafaranga  ari hejuru y’umushahara we yavuze ko iki cyifuzo cya mwarimu leta iramutse icyitayeho byarushaho kubera byiza abarimu.

Yagize ati: Iyo mwarimu akererewe siwe wenyine bigiraho ingaruka ahubwo bigera no ku banyeshuri ugasanga ireme ry’uburezi ridindiye.

Rutayire John umuyobozi mu kigo gishinzwe guteza uburezi imbere mu Rwanda(REB) yavuze ko leta itabona amafaranga yo gutunga mwarimu ajyanye n’ifunguro rya saa sita ko ahubwo icyo yihutiye gukora ari ugushyiriraho  ibigo by’imali bigamije korohereza  mwarimu kubona inguzanyo kandi ko iri kubaka amacumbi hafi y’ibigo bakoreraho kugirango bagabanye ingendo za hato na hato bakoraga.

Yagize ati: “Icyo twifuza nuko mwarimu atera imbere kumuha ifunguro rya buri munsi twumva ari ukumumugaza kurushaho”.

John Rutayidire Umuyobozi wa REB.

Rutayisire yavuze ko bari gufasha mwarimu kwifasha  kuko kuri ubu hashyizweho abarimu b’abanyamahanga (Shool Best Mentors) muri buri murenge bazajya bigisha abarimu bagenzi babo ururimi  rw’icyongereza,kugirango ireme ry’uburezi mu Rwanda ritere imbere.

Muri iyi nama  hafashwe umwanzuro ko hagiye gutegurwa imfashanyigisho zigamije gufasha abanyeshuri  kugira  umuco n’amatsiko yo  kuvumbura bonyine ibyabafasha kwiyigisha bonyine ubwabo mwarimu atabigizemo uruhare wenyine,ahubwo bagafatanya.

Iyi nama ikaba iteraniyemo abafite aho bahurira baturuka mu turere twa Kamonyi, Muhanga, Ruhango na Nyanza two mu Ntara y’Amajyepfo na Karongi na Rutsiro two mu ntara y’iburengerazuba.

MUHIZI Elisée
UMUSEKE.RW/Muhanga.