Iyi nteruro ishobora kuba itari bushimishe benshi ariko kuvuga ukuri kwa HRW y’ iki gihe ntibivuze gushyigikira amakosa ya leta y’ u Rwanda kubirebana n’ uburyo ki ihonyora uburenganzira bwa muntu. Raporo ya HRW imaze iminsi igarukwaho cyane nta gishya yavuze tutari tuzi. Aba youtubers barafunzwe, habayeho gushimutwa no kuburirwa irengero gushingiye ku ukutavuga rumwe na leta y’u Rwanda.

Uyu muryango ukwiye kunengwa uburyarya ukoresha mu guca igikuba na raporo zayo ziza zitabariza abantu ubwatsi bwarameze ku mva! Ni agahomamunwa kubona abantu bawuha amashyi ngo ubavugiye ibintu bikomeye kandi ujya gushyira izo raporo ahagaragara witondeye kudahungabaya “deals” za mpatsibihugu n’ ibihugu nk’ u Rwanda witwa ko uba urega wivuye inyuma!

Ibyo HRW ikora bisa nk’ aho iba ibiziranyeho na mpatsibihugu iba ihaye raporo nk’ impamba kugirango abone uko ahenda umwirabura yitwaje izo nshingano igihugu cye kitujuje, nta zindi mpuhwe ubona iyo HRW iba ifitiye uwo itabariza muri iki gihe. U Rwanda narwo ruramutse ruteye akantu uyu muryango washaka uko uca kuruhande ibyo uba ururega muri izo raporo kuko usanga yitwaza kuvugira abarenganye ikaza gukora “chantage” ya ishyura cyangwa mbivuge!

Iyo ugiye kurunguruka mugikari cy’ uwo muryango ugakuramo inyangamugayo witwaza kugirango wubahwe nka Allison Des Dorges, urumirwa! Ngaho abanyamuryango bayo bashyizwe hanze ngo ni ba collectors b’ibikoresho by’ aba Nazi (Marc Garlasco) ! Ngaho ngo bakiriye ruswa y’abo baregaga ubwicanyi (Kenneth Roth)… Mbese ukareba ugasanga uyu muryango usigaye ugendera ku izina ry’ abawitangiye bari bafite uwo mutima wo kuvugira abarengana batakiriho cyangwa abananijwe n’ ibifi binini byawigaruriye bakawuvamwo!

Afurika ikeneye kwibohora ibi bikoresho bya mpatsibihugu byose ikiremera imiryango yayo, ikayirinda gukorera mu kwaha kwa mpatsibihugu ikareka guhora itegereje ibivuye kwa nyirabayazana y’ amakimbirane aturuka ku umukoloni . Ni imyumvire iteye isoni n’ agahinda dukwiye kureka.

Samuel Kamanzi