Inteko ishinga amategeko yemeje umushinga w’itegeko rifatira ibihano Gatechew Assefa wahoze ayobora ubutasi bwa Ethiopia mu gihe cya Minisitiri Desalegn kuko ngo ariwe uherutse gutegura igikorwa cyo kwica Minisitiri w’Intebe Dr Abiy Ahmed.

Getachew Assefa ngo yashatse guhitana Min Abiy biranga

Gufatira ibihano Assefa byifujwe bwa mbere n’umudepite witwa Mike Coffman. Umushinga w’itegeko ryo guhana uriya mugabo wiswe HR 128 wemejwe na benshi mu bagize Inteko.

Getechew ashinjwa gutegura umugambi wo kwica Abiy Ahmed ubwo yari mu birori byari byateguwe n’abamushyigikiye i Addis Ababa.

Uyu mugabo kandi USA imushinja gufata abagore ku ngufu no kutubahiriza uburenganzira bwa muntu.

Ngo mu gihe yamaze ayobora ubutasi bwa gisirikare yakoreye abantu benshi iyicarubozo muri za gereza zitari zizwi na rubanda.

Ngo zirindwi murizo zari i Addis Ababa. Mu minsi mike ishize abasirikare barindwi bahoze mu rwego rw’ubutasi barafashwe barafungwa.

Jean Pierre NIZEYIMANA

UMUSEKE.RW