PS IMBERAKULI IHANGAYIKISHIJWE N’INKONGI Z’IMIRIRO ZIBASIYE AMAGEREZA

ITANGAZO Nº 2/PS.IMB/017 RIGENEWE ABANAMAKURU
ISHYAKA PS IMBERAKURI RIBABAJWE N’IMPFUNGWA ZIKOMEJE GUKONGOKERA MU MAGEREZA YO MU RWANDA

GEREZA NIMIRIRO                                              Sylver MWIZERWA

Ni kenshi bigenda byumvikana mu magereza yo mu Rwanda ko akunda kwibasirwa n’inkongi y’umuriro, uko iyo nkongi iyibasira niko hangirika byinshi yaba ibikoresho by’abafungwa ndetse n’abahasiga ubuzima bwabo.

Uyu munsi kuwa 31 werurwe 2017 inkongi ikomeye yibasiye gereza ya Gasabo izwi ku izina rya Gereza ya Kimironko, abanyururu benshi bahakomerekeye ndetse n’igice kinini cyayo kirakongoka kuko hahiye utugali twa 6,7,8,9,10,11,3,2…hagasigara gusa 15,14 n’agace ka 13 ibi bikaba bigaragaza ko Gereza yose yahuye n’isanganya.

Ishyaka PS Imberakuri rikurikiranira hafi ibi bibazo byugarije imfungwa, ariko rigasanga ku girango gereza zishye kuburyo abarimo bananirwa kwitabara ari ubucucike mu magereza ndetse n’imyubakire yayo magereza, aho usanga nyakatsi mu magereza nyamara aho abanyamahanga banyura kenshi leta izisenya ku ngufu, ariko ntiyite kuzo yiyubakiye ahihishe ahubwo ikazikomeza.

Ishyaka PS Imberakuri ntiryumva ukuntu Gereza ya Kimironko yamara hafi imyaka 20 Leta yarananiwe kuyubaka mu buryo bwubahiriza uburenganzira bwa muntu, kuko yubakishijwe amahema nayo yabaye imibore, abanyururu bakarara bagerekeranye mu intambwe ebyiri z’intoki, abandi bakarara hanze bicwa n’imvura cyangwa imbeho ndetse n’abari muri ayo mahema bakarara bavirwa, mu gihe abo banyakugorwa birirwa bubakira Leta imiturirwa, yo igahembwa bo bakayura !

Ishyaka PS Imberakuri ribabajwe cyane n’uburyo budaha uburenganzira bwa muntu imfungwa bikorwa na Leta ya Kigali, bityo riyisaba kwita kuri abo bana b’u Rwanda, rirayisaba kandi guha imfungwa ibintu byazo byangirikiye muri izo nkongi, ndetse no kuvuza neza izahangirikiye, rirayibutsa na none ko muri aya magereza harimo bamwe bafungiye akamama ariko bitavuze ko n’abatagafungiye bafatwa bunyamaswa, cyane ko nyuma y’iki hiyongeraho, imirire mibi changwa kubibura, kuvuzwa nabi, kurenganywa mu mamza n’ibindi tutarondoye…

Riboneyeho kwihanganisha  imfungwa n’imiryango yazo haba kuzahakomerekeye ndetse n’izaba zarahaburiye ubuzima .

Imana ibarinde!

Bikorewe i Kigali kuwa 31 Werurwe 2017

Umunyamabanga Mukuru akaba n’Umuvugizi wa PS Imberakuri

Sylver MWIZERWA

https://www.youtube.com/watch?v=_PPHwJ4lfMM