Umutingito upima 5 n’ibice 7 ku gipimo cya Richter wibasiye amajyaruguru y’uburengerazuba bwa Tanzania hafi y’ikiyaga cya Victoria hegereye umupaka wa Uganda.

Abategetsi baravuga ko uwo mutingito wahitanye abantu 13 naho 203 barakomereka.
Amafoto yo ku mbuga nkoranyambaga yerekana amazu yangiritse mu mujyi wa Bukoba utuwe n’abantu barenga ibihumbi 70. Benshi mu bapfuye kandi biravugwa ko ari abo muri uwo mujyi.

Umukuru w’uwo mujyi, Deodatus Kinawila, yabwiye BBC dukesha iyi nkuru ko uwo mutingito wangije byinshi kandi ko abantu bamwe bari bajyanywe mu bitaro batashye.

Umutingito upima 6 ku gipimo cya Richter wibasiye umujyi wa Arusha uri mu burasizuba bwa Bukoba mu kwezi kwa karindwi muri 2007.

Umutingito wabaye kuri uyu wa gatandatu kandi wumvikaniye muri Kenya, Rwanda, Burundi na Uganda. Aho no mu Ntara y’Uburasirazuba bw’u Rwanda hari abo wagiriye nabi urabasenyera, gusa nta muntu kugeza ubu biramenyekana ko yaba yahasize ubuzima.