P.Kagame yagiye muri Tchad mu irahira rya Idriss Deby
Kimwe n’abandi ba Perezida 15 b’ibihugu bya Africa Perezida Kagame nawe kuri uyu wa mbere yitabiriye irahira rya Perezida wa Tchad akaba na Perezida w’Umuryango wa Africa yunze ubumwe Idriss Deby Itno i N’Djamena muri Tchad.
Perezida Itno arahirira kuyobora Tchad kuri manda ya gatanu
Ibiro bya Perezida Kagame bivuga ko agezeyo uyu munsi Perezida Kagame yakiriwe na Minisitiri w’Intebe Albert Pahimi Padacké
Imihango yo kurahira kwa Perezida Idriss Deby yabereye muri Grand Hotel N’Djamena ahari abayobozi b’ibihugu bya Benin, Burkina Faso, Central African Republic, DRCongo, Equatorial Guinea, Mali, Mauritania, Niger, Nigeria, Uganda na Omar el Beshir wa Sudan.
Muri uyu muhango nyuma yo kurahira, Perezida Itno yanahawe umudari w’ikirenga w’ubutwari.
Perezida Idriss Deby Itno amaze gutorwa inshuro eshanu, iheruka ni iyo mu kwezi kwa kane 2016 aho yagize amajwi 62% akurikirwa na Saleh Kebzabo utavuga rumwe nawe wagize 12,7%.
Mu ijambo rye Perezida Itno yijeje kongera gushakira Tchad uburumbuke anasaba abanyafrica kuba umwe no gukorana kugira ngo bagera ku iterambere ry’umugabane wa Africa.
Bwa mbere Perezida Kagame yari ageze muri Tchad, yakoresheje Passport nshya y’umuturage wa Africa aherutse guhabwa mu nama y’Umuryango w’Ubumwe bwa Africa yateraniye i Kigali mu kwezi gushize.
Perezida Kagame yakiriwe na Minisitiri w’Intebe Albert Pahimi Padacké
Imbere ba Perezida Kabila, Kagame, Bashir na Kaguta mu irahira rya Perezida Idriss Deby muri Grand Hotl N’Djamena
Perezida Idriss Deby wahoze ari General atambuka imbere y’ingabo aho yarahiriye
Perezida Deby yahawe umudari w’ikirenga
Perezida Itno arahirira kuyobora Tchad kuri manda ya gatanu
Perezida Kagame hagati ya Itno n’umugore we
Photos/VillageUrugwiro
