Col Tom Byabagamba
Urukiko Rukuru rwa Gisirikare rwasubiztse iburanisha mu mizi y’urubanza ruregwamo Col Tom Byabagamba, Rtd. Brig. Gen. Frank Rusagara na Sgt Kabayiza Francois, kuri uyu wa Kabiri tariki ya 27 Ukwakira 2015.

Col Tom Byabagamba wari kumwe na avoka we bagaragarije urukiko ko biteguye kuburana, ariko haboneka inzitizi yatumye urubanza rutaba.

Umucamanza yabajije Rtd. Brig. Gen. Frank Rusagara niba yiteguye kuburana, agaragaza ko ataburana atunganiwe.

Umwunganira yabuze mu iburanisha ry’uyu munsi urukiko ruvuga ko atarumenyesheje impamvu yo gusiba, ariko mugenzi we uburanira Col Byabagamba akavuga ko impamvu yaba ari uko hakiri urubanza bajuririye Urukiko rw’Ikirenga, basaba ko urubanza rw’abasivili rwatandukanywa n’urw’umusirikare.

Ibi ariko umucamanza yavuze ko bitumvikana, kuko nubwo isomwa ry’urubanza rw’ubujurire ku itandukanywa ry’uru rubanza mu Rukiko rw’Ikirenga ritambura ububasha Urukiko Rukuru rwa Gisirikare gukomeza urubanza.

Umucamanza yasobanuye ko urubanza mu Rukiko rw’Ikirenga rutazitira iburanishwa, kuko dosiye yose, hatabuzemo urupapuro na rumwe, rutigeze ruyakwa.

Umucamanza yavuze ko bishobora kuba ari n’agasuzuguro kuba avoka wa Rusagara atitabiriye iburanisha kandi yari azi ko ruteganyijwe kuri uyu munsi.

Ubushinjacyaha bwo bwasabaga urukiko ko iburanishwa mu mizi ry’uru rubanza ryaba riretse, kuko Urukiko rw’Ikirenga nirwemeza ko urubanza rutandukanywa, ibyakozwe n’Urukiko Rukuru rwa Gisirikare byaba imfabusa.

Umwanzuro w’ubujurire ku itandukanywa ry’uru rubanza utegerejwe kuwa 4 Ukuboza 2015.

Ubushinjacyaha kandi bwerekanye ko isubikwa ry’urubanza ryumvikana mu gihe Rtd. Brig. Gen. Frank Rusagara nta avoka afite kandi ari uburenganzira ahabwa n’amategeko bwo kuburana yunganiwe mu gihe abishaka.

Umucamanaza amaze kumva impande zombi, yabanje kwimurira uru rubanza kuwa 6 Mutarama 2016, avoka wunganira Col Tom Byabagamba asaba ko ku nyungu z’ubutabera rwakwigizwa imbere, ntirushyirwe umwaka utaha.

Urukiko rwaahise rumwumva rufata icyemezo cyo kurushyira kuwa 7 Ukuboza 2015.

Col. Tom Byabagamba ashinjwa icyaha cyo gukwiza nkana ibihuha agomesha rubanda abangisha ubutegetsi, icyo gusebya Leta, gusuzugura ibendera ry’igihugu no guhisha nkana ibimenyetso byashoboraga gufasha kugenza icyaha gikomeye.

Brig Gen (Rtd) Frank Rusagara agashinjwa gukwirakwiza nkana ibihuha agomesha rubanda abangisha ubutegetsi, icyaha cyo gusebya Leta, akanashinjwa gutunga imbunda n’amasasu mu buryo bunyuranyije n’amategeko.

Sgt (demobe) Kabayiza François we ashinjwa guhisha nkana ibimenyetso byashoboraga gufasha kugenza icyaha gikomeye.

Brig Gen Rusagara yatawe muri yombi kuwa 18 Kanama 2014, Col Tom Byabagamba afatwa kuwa 23 Kanama 2014 naho Sgt Kabayiza afatwa kuwa 24 Kanama 2014.

Izubarirashe