Muri twe twese niba kwiyahura ari icyaha bizwi, nkuko ndi kubisoma i Rwanda, nkanabona bamwe bafite ubukana mu magambo, gushinyagura n’ibindi kuri za Websites, Facebook ni iki kibaha uburenganzira bwo gushyiraho akadomo?

Ninde uzi ijambo rye rya nyuma muri uwo mugozi muvuga yaba yavuze? Ese abonye ko ari wenyine kandi wenda atakiwikuyemo muzi yashizemo umwuka avuze iki?

Yaba se byo ntaryo yavuze ko nabyo bishoboka turamukurikiza induru kubera iki? Harya ngo dufite ukuri kuko ngo kwiyahura ari icyaha tuvuge? Muri make inkuba yakubise mu baturanye twe tujye kuragira ihene? Igikuba cyacitse none tubyutse imirishyo?

Ni ryari tuzarengwa nikibaye kikaturusha ubushobozi kikaturenga tukanuma tugaceceka?

Kuva ejo nsoma abatukana, abavumana, abashinyagura ariko kwihangana biranze harya ngo nyirumupfu niwe ufata ahaboze! Niko iyo wowe wumiwe iwawe Isi yakwikaragiyeho wabyifatamo gute mu kaga kakurenze?

Wakwifuza se ko rubanda bagukurikiza induru? Abazima mu bwenge no mu mutwe bataye inkonda bavuma, abapfuye bahagaze mwabonye ikiryo mbega abantu nako abanyarwanda, umuntu mw’Isi tumutunga urutoki no mu rupfu tumukurikiraneyo?

Ngaho ngo”Mwabonye ibyabaye? Ese kanaka wamenye ibye? Muzi se ko yiyahuye? ” Ko bizwi uravuga iki? Hari utabyumvise? Ararimbutse daaaa ehhhhh mwagiye ariko mushyira utudomo kubuzima bwanyu ubwabandi mukabureka cyangwa mukarekeraho.

Nyirumuringa Rugira Wambaye Ubudahemuka ko ntawuzi aho Avuganira na buriwese. Isegonda ry’ubuzima bwa buri muntu ni nawo mwanya we wanyuma n’Imana ye mbisubiremo Imana Ye, not Iyacu muri iryo segonda niwe uba ari kumvwa. Hari uwari uhari? Ese unahari nibangahe tubona ibyo roho yiyumvira?

Ntanarimwe Isi Irarangira kuko turacyayirimo, ngo maze dutungurwe no kubona abacu batashye kandi benshi tuzatungurwa no kubona abatashye tukabakurikiza induru turikumwe mw’ijuru benshi bafuhira bagize iryabo nkaho aribo bashinzwe gukora liste?

Niko ibyacu ko byadushobeye mwamenye ibyanyu mukareka kuvuma ufite abe bamukundaga! Murongera icumu mu gikomere kubera iki?

Iby’ijuru ni amayobera ndicecekera. Kuko Imana Irahebuje ndabona Muyizi kundusha ariko gake Nyiziho Sindayitekerereza ngo nihe ijambo ryanyuma ku umuntu wese wapi aho bindenze ndanuma kuko ntazi rya segonda rya nyuma uko bigenda, ntanuwabimenya muri twese kuko ntawurahagera.

Nimuhore utubashye uwatabarutse nubwo yaba kuri benshi yakoze ikosa nubwo mwaba mufite ukuri, ikirenze nyirugukorwamo uraceceka niko ubupfura bumeze. Ibi bintu dukwiye kubyiga I Rwanda nukuri birakwiye. Ntasoni?

Uwo mbabaza hano ambabarire nanga urutoki rutuzwe muntu n’umunwa wogutogerwa no kuvugwa ikibi nkaho wowe uri Saint Pierre!kuko urutoki n’umunwa byaranseye binyica mpagaze.

Mumfashe nukuri duhe umuryango wa nyakwigendera umwanya ukwiye umwana wabo, umuvandimwe, umufasha, umubyeyi kuko burya twese imbere y’abacu batwibuka kuri byinshi byiza , waba ufite ibigwi bikaguherekeza nubwo haza inkuru y’incamugongo. Uwawe umwunamaho no mukaga nturekura kubw’agaciro yahawe bwo kwitwa umuntu.  Murakoze

 

Nyakwigendera Richard Mazimpaka

 

Mr Richard Mpazimpaka mbabajwe no kukumenya umunsi utabarutse ariko kuko ndi umunyabyaha nta burenganzira nabumwe nakwiha bwo kugukurikiza ijambo ribi ryose, nta n’ubupfura buke nagira ntigeze bwanyemerera gutoneka umuryango wawe, ndi umunyamafuti bimpa uburenganzira bwo guca bugufi no kumva ibirenze kuko Uwiteka Yanyumvise kenshi Ampaza ntabikwiye kuki nakwiha mfura ya benshi. Ruhuka itahe n’ubusa, nifatanyije mu guca bugufi kwinshi n’umuryango wawe. Uwiteka Abahe gukomera muri ibi bihe.
Murakoze

Dady de Maximo Mwicira-Mitali